«Қоғамдағы үш анық» айдары бүгін сіздерге осы жылдың 1-шілдесінен бастап жүзеге асырылатын зейнетақы жүйесіндегі өзгерістер жайлы арнайы дайындалған сұхбатты ұсынады.
Биылғы, яғни 2018 жылдың шілде айынан бастап базалық зейнетақыны тағайындау тәртібі өзгереді. Барлық зейнет жасына жеткен азаматтар еңбек өтілінің бар-жоғына қарамастан, жәрдемақымен қамтамасыз етілмек. Оларға мемлекеттік бюджет есебінен төленетін базалық зейнетақы көлемі, еңбек өтілі мен зейнетақы жүйесіне қатысу мерзіміне тікелей байланысты болмақ. Енді осы тақырып аясында, зейнетке шығу жасы мен тағайындалатын зейнетақы мөлшеріне енгізілген жаңа өзгерістер жайын білу мақсатында, біз ҚР Еңбек және әлеуметтік қорғау министрлігінің Еңбек әлеуметтік қорғау және көші-қон Комитетінің Астана қаласы бойынша департаменті басшысының орынбасары Мұқияев Орал Әміртайұлынан сұрап білген едік.
- Орал Әміртайұлы, жыл сайын егде адамдар зейнетақының көтерілуін күтеді. Осыған сәйкес 2018 жылдың 1 шілдесінен бастап қандай өзгеріс енгізілмек?
-Елбасының тапсырмасына сәйкес, 2018 жылдың 1 қаңтарынан бастап зейнетақы немесе зейнеткерлердің жасына байланысты зейнетақы 8 % немесе инфляцияның жоспарланған шегінен 2 % көтерілді.
Мемлекеттік базалық зейнетақы және жәрдемақылардың басқа түрлері 6 %-ға артты. Сонымен, биыл 2018 жылы ең төменгі зейнетақы мөлшері мемлекеттік базалық зейнетақыны қоса есептегенде 49 019 теңгені, ал зейнетақының орташа мөлшері 69360 теңгені құрады.
Сондай-ақ, сіздің сұрағыңызға сәйкес, осы жылдың 1 шілдесінен бастап мемлекеттік базалық зейнетақыны тағайындау механизмі өзгереді. Белгілі болғандай, бүгінгі күнде базалық зейнетақы азаматтың еңбек өтіліне және табысына қарамастан баршаға бірдей тағайындалады.
Базалық зейнетақыны тағайындаудың жаңа механизмі 1998 жылдың 1 қаңтарына дейін жинақталған еңбек өтілін және 1998 жылдан кейін жинақтаушы зейнетақы жүйесіндегі кезеңдерін есепке алады.
-Кеңірек түсіндіріп өтсеңіз... Сонда бұл кезеңдер іс жүзінде қалай қаралады?
-Бір мысал келтірейін:
біріншіден, азамат 1998 жылдың 1 қаңтарына дейін 20 жыл еңбек кітапшасымен расталатын еңбек өтілін ұсынды, және
екіншіден, бұл азамат 1998 жылдан кейін 15 жыл міндетті зейнетақы жарналарын жинақтаушы зейнетақы жүйесіне аударған, ол туралы Мемлекеттік корпорацияның Бірыңғай есептеу орталығымен расталған (бұрынғы МЗТО Мемлекеттік зейнетақы тағайындау орталығы).
Бұл ретте, базалық зейнетақыны тағайындау барысында жинақталған еңбек өтілі 35 жылды құрайтын болады (20 жыл еңбек өтілі+15 жыл жинақтаушы зейнетақы жүйесінің қатысушысы). Яғни, базалық зейнетақының мөлшері 2018 жылдың 1 шілдесінен бастап 28 284 теңгені немесе ағымдағы жылы 2 есе көп мөлшерді құрайды.
-Ал базалық зейнетақының мөлшері ше? Баршаға бірдей бола ма?
-Жоқ, ол азаматтардың еңбек өтілінің жиынтығына қарай әр түрлі болады. Жоғарыда айтылғандай, 2018 жылдың 1 шілдесінен бастап, егер азаматтың еңбек өтілі 33 жылды құрайтын болса, базалық зейнетақының мөлшері ең төменгі күнкөріс деңгейінің (әрі қарай – ЕКД, республика бойынша) 100% немесе 28 284 теңге, 20 жыл еңбек өтіліне – ЕКД-нің 74% немесе 20 930 теңге, 10 жылға дейінгі еңбек өтіліне – ЕКД-нің 54% немесе 15 274 теңгені құрайтын болады.
-Бұл өзгерістер барлық зейнеткерлерге қатысты бола ма, әлде тек 2018 жылы зейнетке шығатындарға ғана ма?
-Иә, бұл өзгерістер бүгінгі күнде зейнетақы алатын азаматтарға да, биылғы зейнетке шығатын азаматтарға да, яғни барлық зейнеткерге қатысты болады. Бүгінгі күнде барлық зейнетақы істері қаралып, барлық есеп-қисап жүргізіліп және қосымша қаражат қажеттілігі анықталды. Қайта есептеуді жүргізу үшін зейнеткерлерден қосымша құжат қажет етпейтінін, зейнетақы ісіндегі құжаттар және Мемлекеттік корпорацияның Бірыңғай есептеу орталығының ақпараттары жеткілікті екенін айта кеткен жөн.
--Ал осы зейнетке шығу жасының кезең-кезеңімен көтерілуі, биылғы зейнетке шығатын әйелдерге қатысы бар ма?
-Ия, міндетті түрде. 2018 жылдың бірінші жартысында 58 жасқа толатын әйелдерге зейнетақы 2018 жылдың 1 шілдесінен бастап тағайындалатын болады. Мемлекеттік базалық зейнетақыны тағайындау барысында жоғарыда айтылғандай, еңбек өтілінің жиынтығы, яғни 1998 жылдың 1 қаңтарына дейін еңбек өтілі және жинақтаушы зейнетақы жүйесінің қатысу кезеңі есепке алынады.
-Орал Әміртайұлы, аләйелдердің зейнетке шығу жасының ұлғаюы қалай есептелмек?
-Бұл жерде ынтымақты зейнетақы еңбек өтіліне байланысты және толық ынтымақтық зейнетақы 1998 жылдың 1 қаңтарына дейін 20 жыл еңбек өтілі бар әйелдерге тағайындалатынын білесіз.
Ал биылғы зейнетке еңбек өтілі 18 жылды құрайтын 1960 жылы туылған әйелдер шығатын болады.
1970 жылы туған әйелдердің еңбек өтілі 10 жылға тең болады, ал 1980 жылы туған әйелдердің еңбек өтілі мүлдем болмайды.
Тиісінше, ынтымақты зейнетақы мөлшері пропорционалды түрде ұсынылған жинақталған еңбек өтіліне қысқарады.
-Ал осы жаңа өзгерістерге сәйкес, әйелдердің зейнетке ерте шығуына қатысты жеңілдіктер сақтала ма?
-Ия, міндетті түрде. Ол мәселе қарастырылған.
Біріншіден, 5 бала туған әйелдер 53 жасында зейнетке шыға алады. Бұл ретте, мемлекет 12 жылдан артық емес, әр балаға 3 жыл еңбек өтілін қарастырып отыр.
Екіншіден, егер әйелдердің жеке зейнетақы жинақтау шотында жеткілікті зейнетақы жинақтары бар болса, онда 50 жасында зейнетке шыға алады. Бүгінде ол сома 12 млн.-нан көп болуға тиіс. Қаражаты жетпеген жағдайда аннуитетті сатып алу үшін үшінші тұлғалардың (жұбайы, балалары және басқа санаттағылар) жарналарын қолдануға мүмкіндік болады.
-Орал мырза, оқырмандарымыздың көкейінде жүрген сұрақтарға жауап беріп, бізге сұхбат бергеніңізге рахмет. Алдағы атқарар жұмыстарыңызғатабыс тілейміз.
Сұхбаттасқан Салтанат Сәдібекқызы