Елордада 2050 жылға дейінгі Астананың даму стратегиясы әзірленуде, деп хабарлайды Qazir. kz Астана әкімдігінің ресми сайтына сілтеме жасап. Бұл туралы бүгін Астана әкімі Бақыт Сұлтановтың төрағалығымен өткен қала активінің кеңейтілген аппараттық кеңесінде айтылды.  

«Астананы дамыту мәселесі Мемлекет басшысының тұрақты бақылауында. Ел Президенті айтқан жаңа мақсаттар мен міндеттер қаланың ұзақ мерзімді дамуын түзетуді талап етеді. Сондықтан біз Астананың 2050 жылға дейінгі даму стратегиясын әзірлеуге кірістік», – деді Бақыт Сұлтанов.

 Қала әкімінің айтуынша, 2030 жылға қарай халық саны 2 млн адамға дейін өссе, 2050 жылға қарай 3 млн адамнан асады деп күтілуде. Осыған байланысты, Астананы жаһандық қала ретінде дамыту бірнеше негізгі бағыттар бойынша жүзеге асырылады деп жоспарланып отыр. «Біріншісі – адами даму. Қаланың басты капиталы – тұрғындар. Таланттарды тарту және олардың қаладан кетуін болдырмау үшін қалалық ортаны барынша тартымды және жайлы ету керек. Ең алдымен, бұл – қолжетімді, сапалы тұрғын үй, қауіпсіз қоғамдық көлік, денсаулық сақтау мен білім берудің жоғары сапасы, қоғамдық қауіпсіздік. 

Екіншісі – қаланың креативті экономикасы. Мемлекет басшысы атап өткендей, Астананың тартымды туристік дестинациясын өзгерте отырып, ақылды және мейірімді қалаға айналуына ерекше көңіл бөлінетін болады. Бұл қонақжайлылық атмосферасын қалыптастырып, тұрғындар мен туристер үшін қалалық сервисті жақсарту да. Астана жаһандық сауда ағындарының хабына, ең ірі тұтыну нарығына және елдің негізгі көлік-логистикалық торабына айналуы тиіс. Тиісінше, бұл – қала қазынасына қосымша салықтар. 

Үшінші – қалалық жоспарлау. Бұл стратегиялық қалалық жоспарлаудың жаңа форматына көшуді білдіреді. Ол үшін біз 2035 жылға дейін Астананы дамытудың жоспарын әзірлейміз», – деп атап өтті Б.Сұлтанов.