Алматы қаласы физика-математика бағытындағы Назарбаев Зияткерлік мектебінің 12 сынып оқушысы Ақназар Қажымұрат халықаралық ACT мен SAT Subject Test-тен 36-36, 2400 сұрақтың 2400-іне дұрыс жауап берген. Бұл жағымды жаңалықты алдымен ол оқитын зияткерлік мектептің ресми сайты жариялаған болатын.Әлеуметтік желілерде де Ақназардың жетістігіне қуанып,көпшілікке үлгі етіп жүрекжарды жазбаларын қалдырып жатқан замандастары мен достары аз емес.
НЗМ ресми сайтының мәліметінше, ACT (Americian College Testing) АҚШ оқушыларының басым көпшілігі жоғары оқу орындарына түсу үшін тапсырады. Беделді оқу орындары ACT -дан 30-36 балл жинаған абитуриенттерді қабылдайды. Америкада тест тапсырғандардың 0.1% ғана барлық 36 сұраққа дұрыс жауап берген. Ал басқа елдерде аталмыш емтиханды жүз пайыз мүдірмей өткендер саны саусақпен санарлықтай. ACT-ның орта композиттік балл көрсеткіші 21,1.
SAT Subject Test – бұл емтихан АҚШ беделді оқу орнына түсу үщін тапсырылады. Тест оқушының бес бағыттағы білім деңгейін өз таңдауы бойынша анықтайды.
Ақназар математика, физика, биология пəндерінен тест тапсырып əр пəннен ең жоғары 800 баллдан жинаған. Бұдан өзге оқушының IELTS халықаралық емтиханынан алған нəтижесі 8.0-ді көрсеткен.
Ақназардың бірегей нəтижелері оқушының əлемдік деңгейде мықты деп танылған университеттерге түсуге жол ашады. Зияткерлік мектептің болашақ түлегі оқуын Гарвардта жалғастыруды жоспарлап,қазіргі таңда қабылдау комиссиясының шешімін күтуде.
Ақназардың бұған дейін де есімі жас таланттардың арасында кеңінен танымал. Зияткерлік мектеп оқушысының дипломдар мен медальдардан құралған коллекциясы бар. Олар: Жəутіков жəне Эйлер олимпиадалары, Новосібір, Қытай жəне тағы басқалары. Ақназар ғылымның кез-келген түрінен сирек кездесетін талантқа ие.
Оқушының жарқын жеңістерінің бірі Пекинде өткен S.-T Yau High School Science Awards атты əлемнің күрделі олимпиадасындағы жеңісі оның математикадағы қабілетінің жоғары екенін дəлелдеді. 2017 жылдың жазында Индонезияда физика саласында өткен халықаралық олимпиадада қазақстандық вундеркинд тағы да жеңіске жетті. Бір жылдан соң Ақназар Қажымұрат APHO 2018 19-шы Азия олимпиадасында алтын иеленген еді. Биыл ол Тайландта өткен Жер туралы ғылым IESO 2018-де күміс жүлдегер атанды.
Дереккөз: nis.edu.kz
Фото: Юрий Беккер.
