«АЛПАҒҰТ» түркі халықтарын біріктіріп,ежелгі жауынгерлік өнерді жаңғыртпақ.Бұл туралы «Түгел Медиа» орталығының бастамасымен ұйымдастырылған «Дөңгелек үстел» отырысында жан-жақты айтылды.
Қазақстанның еңбек сіңірген қайраткері, республикалық «Ұлы Дала Қырандары» қоғамдық қозғалысының тең төрағасы, ҚР еңбек сіңірген қайраткері Сәдібек Түгел тың тақырыпты насихаттау үшін БАҚ өкілдеріне осы шараны арнайы ұйымдастырып отырғандығын айта келе, бұл спорт түрінің жастар бойына отансүйгіштік сезім қалыптастыратындығына тоқталды. Бастауын біздің дәуірімізге дейін екінші-үшінші ғасырлардан алатын ежелгі түркі жауынгерлік әдісін қайта жаңғыртып, «бірлесе көтерген- жүк жеңіл» ,-деп бауырлас халықтардың басын біріктіруді мұрат тұтқан отырыста Халықаралық Түркі жекпе-жегі «АЛПАҒҰТ» федерациясының бас хатшысы Аманжол Түберов, «ҚР Ұлттық Түркі жекпе-жегі «АЛПАҒҰТ» федерациясы» президенті Ынтымақ Құлтасов , Қырғызстан Республикалық Таймаш Ұлттық жекпе-жегі федерациясы президенті әрі негізін қалаушы Ақтан Ажмамбетов, «ҚР Ұлттық Түркі жекпе-жегі «АЛПАҒҰТ» федерациясы» бас бапкері Әліби Айтқалиев және осы шараға қатысып отырған жауапты сала өкілдері өз ойларын ортаға салып,қойылған сауалдарға жауап берді. Саясаттанушы Кенжеболат Жолдыбай, кинорежиссер Еркін Рақышев, Қазақстан Республикалық Джиу-джитсу Ассоциациясы вице-президенті Болат Мұқанов және басқа да қатысушылар 2019 жылы құрылатын «АЛПАҒҰТ» Азия федерациясы мен Астана қаласында өткізілуі жоспарланған ежелгі түркі спорт түрінің Азия ойындары жайлы нақты ұсыныстарын жеткізді.
«АЛПАҒҰТ» Азия федерациясының президенті болып белгілі кәсіпкер, «Қазақ Елі» халық палатасының президенті Бақыт Нұғыман, көрнекті мемлекет және қоғам қайраткері, Біріккен Ұлттар Ұйымының Қазақстандағы бөлімшесінің басшысы Жекен Қалиев аталмыш федерацияның құрметті президенті лауазымына сайланды.
Франциядағы «Қазақстанның күз сыйы» талғампаз жұртшылық көңілінен шығуда. «Франциядағы Қазақстан күзі» жалғасуда, деп хабарлайды «Хабар 24». Нұрғиса Тілендиевтің «Отырар сазы» оркестрі талғампаз француздарды өз өнерімен баурап, қошаметке бөленуде. Елдің оңтүстігіндегі Монпелье мен Канн қалаларында өткен концерттерде ине шаншар орын болған жоқ. Нұрғиса Тілендиев атындағы фольклорлы-этнографиялық оркестрінің бұл Францияда өтіп жатқан екінші концерті. Қазақ музыканттары «Франциядағы Қазақстан күзі» жобасы аясында өнер көрсетпек. Көрермендер концертте қазақ композиторлары Ықылас пен Түркеш, Нұрғиса Тілендиев, Евгений Брусиловскийдің шығармаларын тыңдап, домбыра, қобыз, жетіген, саз-сырнай секілді халық аспаптарының үніне тәнті болды. Сондай-ақ оркестр белгілі француз музыканттары Мишель Легран мен Шарль Азнавур шығармаларын орындаған.
«Әміре» фильмінің операторы Грузияда өткен фестивальде арнайы жүлдемен марапатталды. «Әміре» фильмінің операторы Максим Осадчий («9 рота», «Сталинград») Тблисиде қыркүйектің 27-сі мен 28-і аралығында өткен Golden Eye («Алтын көз») атты халықаралық кино- және телеоператорлар фестивалінде Panasonic компаниясының арнайы жүлдесіне ие болды. Сондай-ақ аталған кинотуынды фестивальдің арнайы дипломымен марапатталды. Биыл сәуір айында жалпыұлттық прокатқа шыққан кинотуындыда қазақтың тенор дауысты біртуар әншіcі Әміре Қашаубаевтың ғұмыры жайлы баяндалады.
Елбасы кітапханасында 10-11 қазан күндері өтетін әлемдік және дәстүрлі діндер көшбасшыларының VI съезіне арналған «Руханият тіректері» атты кітап көрмесі ашылды. Көрмеде әлемдік діндердің қасиетті кітаптары, ғылыми монографиялары, өнер және сәулет тарихына арналған 200-ден астам еңбектен діндердің пайда болуы және даму тарихы жайлы ғана емес, діни дәстүрлердің уақыт және кеңістік аясындағы сабақтастығын да көруге болады.Көрме 2019 жылғы 30 қаңтарға дейін жалғасады.
Әлемнің үздік сиқыршылары Қазақстанда өнер көрсетеді. 6-7 қазанда Астана қонақтары мен тұрғындарына алғаш рет "Иллюзионист" әртістер шоуы көрсетілмек. Ол EXPO-ның Конгресс-орталығында, ал 10-11 қазан аралығында Алматыдағы Республика Сарайында өтеді.
Шоу 25 елдің 200 қаласын аралап, Бродвейдің ең танымал шоуына айналды.Жаңа нұсқада фальсификатор Харрисон Гринбаум, шоумэн Марк Калин, фокусшы Джинжер Лайт, ұмытылмас Энзо, жүгіру шебері Крэндл, манипулятор Николас Себастьян және қару шебер Робин Шарп өнер көрсетеді. Олардың әрқайсысы өзіне тән өнерімен ерекшеленеді. Шоу барысында арбалеттен ату, фокустар, үлкен иллюзия, левитация және тағы басқа да өнер түрлері көрермен назарына ұсынылатын болады.
Шолуда пайдаланылған мәліметтер ашық ақпарат көздерінен алынды.
