2019 жылдың 14 қазанында сағат 18.30-да Visit Almaty ғимаратында «Таланттарды таныту» жобасы аясында алматылық ақын, композитор және музыкант, сонымен қатар, «Қазақстан жазушылары клубының» президенті Игорь Бушмелевтің шығармашылық кеші өтеді. Іс-шараға Қазақстан халқы Ассамблеясының мүшелері, этно-мәдени бірлестіктер өкілдері және Алматы қаласының шығармашыл жастары қатысады, деп хабарлайды Qazir.kz
Шара мақсаты - әдебиеттің дамуына сүбелі үлесін қосып жүрген дарынды шығармашыл тұлғаларды қазақстандықтарға таныту. Игорь Бушмелев - алматылық жас ақын, композитор. Оның өлеңдері «Рапсод» баспа жинағында жарық көрген. Сондай-ақ, Игорь АРТиШОК театрының, «БУНКЕР» ART сахналарында және Алматының өзге де шығармашылық кештерінде өнер көрсеткен. Өз кезегінде, ол өзінің абсолютті антимейнстрим стилінде шыққан «Ворона» атты дебюттық музыкалық альбомында тыңдармандарды ертегі аңызына ұқсас, алайда, шын мәнінде болған махаббат тарихымен таныстырады.
Сонымен қатар 15 қазанда сағат 10.00-де Алматы Полиграфия колледжінде «Рухани жаңғыру» күні өтеді. «Рухани жаңғыру» күні аясында «Ұлы дала тарихы- ұрпаққа аманат» атты кездесу, «Қазақтану», «Өзгерісті өзіңнен баста» мәдени-ағартушылық лекторийлері, «Ұлы дала өнері» атты көрме, Book dating, Талантты таныту, Буккроссинг, және т.б. шаралар өтеді.
Шара барысында профессор, ғалым, қоғам қайраткері, Қазақстанға еңбек сіңірген қайраткер, «Парасат» орденінің иегері, тіл жанашыры Асылы Әлиқызы Осман, Қазақстан дінтанушылары конгресінің төрағасы, философия ғылымдарының докторы, профессор Бақытжан Меңлібекұлы Сатершинов,философия ғылымдарының докторы, Абылай хан атындағы Халықаралық Қатынастар және Әлем Тілдері Университетінің профессоры Зейінәбіл Смайлханұлы Айдарбеков, зерттеуші, ғалым, марғұлантанушы, Ә. Марғұлан атындағы қоғамдық қордың президенті Дәнел Марғұлан, Халықаралық «Жанашыр» қоғамдық қорының президенті Жаңыл Амантайқызы Әпетова, Абылай хан атындағы Халықаралық Қатынастар және Әлем Тілдері Университетінің Қазіргі заманғы Қазақстан тарихы және дүниетанымдық пәндер кафедрасының доценті, философия ғылымдарының кандидаты Мақпал Абилқызы Жекебаева, Алматы Полиграфия колледжінің директоры Билалдин Алякбарұлы Ахметов, «Азаматтарға арналған үкімет» КЕАҚ-ның бас маманы Ли Сұлушаш Асылханқызы қатысып, жастармен рухани жаңғыру тақырыбында әңгіме өрбітеді. Шара Қазақстан Республикасы Ақпарат және қоғамдық даму министрлігі «Азаматтық бастамаларды қолдау орталығының» қолдауымен Халықаралық «Жанашыр» қоғамдық қорының ұйымдастыруымен өтеді.
