Бүкіл әлемге белгілі «Спанч Боб» мультфильмінің мюзиклі шықты. Толығырақ «Сиқырлы әлем» айдарының бүгінгі санында танысыңыз.

Американдық «Sponge Bob Square Pants» мультипликациялық сериалы 1999 жылы 1 мамырда "Nickelodeon" телеарнасынан бірінші рет көрсетілді. Содан бері дүниежүзі көрермендерінің сүйікті мультфильмі экраннан жоғалған жоқ. Ал 2017 жылдың 7 маусымында тұңғыш рет Спанч Бобтың бродвейлік мюзиклі қойылды. Мюзиклдің әлемдік тұсау кесерін көрермендер Чикаго қаласында тамашалаған.

«Спанч Боб» мюзиклінің бас кейіпкерлері мүлде мультсериалдағыдай киінбеген. Спанч Бобты сомдайтын актер Итан Слэйтер шашы сары ақкөңіл жігіт, тор көзді қоңыр шалбармен жүреді. Мұхит жұлдызы Патрикті ойнаған Дэнни Скиннердің қызғылт шашының үлгісі жұлдызға ұқсас, аңқау жігіт. Тиын Сэндидің рөліндегі актрисаның шашы африкалық үлгіде, шашының арасына гүл қысытырылған.

Сюжеті: Су астындағы Бикини Боттом қаласы жойылу үстінде,  оның тұрғындарының өміріне қауіп төнеді. Қалада қорқыныш пен қарбалыс басталады. Қаланы құтқарудың амалы табылмай, үміттің үзілген шағында, ойда жоқта жаңа қаһарман пайда болады. Ол, әрине, Спанч Боб және оған көмекке келген достары – мұхит жұлдызы Патрик, ержүрек тиын Сэнди, пессимист сегізаяқ Сквидвард 

Сыншылардың айтуынша, мюзикл барлық жастағы көрермендерге арналған:

«Мюзиклде өте әдемі әлем көрсетілген. Шытырман оқиғалы ойын-сауықтың ортасына тап болғандай  балалар тамаша әсер алады. Үлкендер болса кеңседен тыс жерде рахаттанып демалғандарына қуанады».

Айта кетейік, бұған дейін (2004, 2015ж) Спанч Бобтың кинотеатрлардан екі бірдей толықметражды мультфильмі көрсетілген болатын. Енді 2019 жылы Спанч Бобтың өмірі жайлы үшінші мультфильм үлкен экранға шығады.

Шетелдік ақпарат көздерінен алынған мәліметтерден дайындаған     Мақпал Аманбай.

Фото: Musicals.Ru