Жаңа жылды жасы да, кәрісі де ғалам ғажабына бөленетіндей тағатсыздана күтетіні жасырын емес. Ертегі мен еліктірген сиқырлы сезімдерге бөлейтін мереке қарсаңында қайсымыз қандай сыйлық береміз, болмаса қандай демалыс орындарына барамыз, қай жердегі қандай мәдени шараға қатысамыз деп бас қатыратынымыз тағы бар. Сый дегеніміз әдетте сән-салтанатын келістіріп айтқан жылы сөз, белгілі материалдық игілік, болмаса рухани азық болуы мүмкін.
Астаналықтар мен қала қонақтарына, әсіресе талғамы жоғары, классиканың көркем әдіс-тәсілдермен жаңа заман үйлесімдегі көрінісін тамашалағысы келетін таңдармандар үшін «Астана» концерт залының сахнасында камералық хордың Сіздерге дайындаған жаңа-жылдық сиқырына куә болуға келіңіз.
Желтоқсанның «27» жұлдызында білім беру ісінің үздігі, мәдениет қайраткері, профессор Гүлмира Құттыбадамова бастаған Астана қаласының әкімдігінің Мемлекеттік академиялық филармониясының камералық хорының ұжымы сиқырға толы ертегі сыйлайды.
«Музыкадан әсерлі, құлақтан кіріп бойды алатын басқа ненің болуы мүмкін? Нағыз меломандар үшін мінсіз орындау, жаңаша формат және классиканың керемет келбетін көрсете алатын келісті ырғаққа салынған заманауи хиттер керек. Осының барлығын біздің ұжымның хормейстері Ержан Сансызбаев, концертмейстер Гүлден Базыкен барын салып, әзірлеу үстінде. Әсірелемей-ақ айтар болсақ, бұл ғажайыптар әлеміне әкететін әсерлі кеш болмақ.
Музыканттарымыз да әр әннің таңдалымы мен орындалуына бұрын-соңды болмаған ынта-жігермен, асқан жауапкершілікпен қарап, репертуарға енгізілген әр хитті құлақтың құрышын қандыратындай етіп шырқауға әзір. Біз бұл жолы әлемдік орындаушылардың хиттерін де репертуарға енгізіп отырмыз. Мысалы, Мэрайя Кэридің орындауындағы туындылар. «Magic moments» барысында тағы да басқа танымал рождестволық туындылар орындалады»,- деді Г.Құттыбадамова.
Камералық хор бұрын-соңды репертуарында болмаған, бірінші рет тыңдарман назарына ұсынатын «Magic moments» элегантты талғамның кез-келген эскалациясына сай келетініне күмәнданбаңыз, көрермен! Академиялық филармонияның камералық хорының әртістері кәсіби орындаушылық шеберліктерімен шыңдалған, біліктіліктерімен бірталай белесті бағындырған. Биыл бұл ұжымға 25 елден жиылған 500 астам қатысушының басын қосқан «Астана – әлем дауысы» Халықаралық фестивалін ашу сеніп тапсырылған, бірнеше мәрте престижді халықаралық байқаулар мен фестиваль лауреаты атанған ұжым Сіздерді 27.12.2018 ж. «Астана» концерт залының төрінде 19:00 сағатта күтеді.
Анықтама үшін: 87710003997, 87014918818.
Иллюстративное фото - архив редакции.
