20 жылда елорданы дамытуға жұмсалған қаржы бюджетке 3 есе болып қайтарылды
Былтыр қала экономикасына 1 трлн 56 млрд теңге инвестиция тартылған, деп хабарлайды Qazir.kz елорда әкімдігінің ресми сайтына сілтеме жасап.
«Өткен жылы қала экономикасына 1 трлн 56 млрд теңге инвестиция тартылды. Біз мұндай межені алғаш рет бағындырдық. Бұл қаланың өз-өзін жеткілікті қамтып отырғандығын және инвесторлар үшін, шағын және орта бизнес үшін тартымды екендігін білдіреді», – деді инвестиция және кәсіпкерлікті дамыту басқармасының басшысы Әлішер Әбдіқадыров.
Оның мәліметі бойынша, егер бұрын қала бюджеті жартылай мемлекеттен қаржыландырылса, бүгінде қаланы дамытуға тартылған жеке инвестициялар 86%
«Бір айта кетерлігі, инвестицияның 71% шағын бизнеске тиесілі. Өткен жылы инвестицияның 750 млрд теңгесін осы шағын бизнес субъектілері құйды», – деді ол. Инвестициялар құйылатын негізгі секторларға жылжымайтын мүлік және көлікке қатысты орындалатын операциялар жатады.
«Егер Астананы жоба ретінде қарастырсақ, ол өте қолайлы, экономикалық тұрғыдан өте тиімді жоба. 20 жыл ішінде Астананы дамытуға бюджеттен шамамен 2 трлн теңге қаржы бөлінсе, қала бюджетке 6 трлн теңге қайтарды», деді Әлішер Әбдіқадыров.
Иллюстративное фото - архив редакции.
