2019 жылғы 22-27 тамыз аралығында Қазан қаласында (Ресей) WorldSkills International құзыреттіліктері бойынша 45-ші «WorldSkills Kazan 2019» әлем чемпионаты өтеді, деп хабарлайды Qazir.kz ҚР Білім және ғылым министрлігі ресми сайтына сілтеме жасап.
63 елден 1 400-ден астам жас маман 56 құзыреттілік (мамандық) бойынша сайысқа қатысады. Чемпионатқа әлемнің әр түкпірінен 16-22 жас аралығындағы жас мамандар өздері таңдаған құзыреттілік бойынша медаль алу мүмкіндігі үшін күреседі. Чемпионатқа қатысушылар WorldSkills стандарттары бойынша ұлттық жарыстарда іріктелінген өз еліндегі ең мықтылар болып табылады. Оларды 1 300-ге жуық сарапшы бағалайды. Жарыс «Казань Экспо» халықаралық көрме орталығының базасында өтеді.
Қазақстаннан 34 қатысушы 31 негізгі құзыреттілік : «Ұялы робототехника», «Бизнеске арналған IT шешімдер», «Электромонтаж», «Аспаз ісі», «Мехатроника», «Инженерлік графика CAD», «Сандық бағдарламалық басқару бар станоктар айналдыру жұмыстары», «Дәнекерлеу технологиясы», «Плиткамен қаптау», «Кузовты жөндеу», «Сантехника және жылыту», «Электроника», «Веб технологиялар», «Кірпіш қалау», «Құрғақ құрылыс және сылақ жұмыстары», «Кескіндеме және сәндік жұмыстар», «Шаштараз өнері», «Сән үлгісі», «Кондитерлік бұйымдар», «Жеңіл автомобильдерді жөндеу және қызмет көрсету», «Мейрамханалық қызмет көрсету», «Тоңазытқыш және желдету жабдықтарына қызмет көрсету», «Желілік және жүйелік басқару», «Графикалық дизайн», «Көрнекі мерчендайзинг и витринистика», «Наубайхана ісі», «Қонақ үй басқару», «Жүк машиналарына техникалық қызмет көрсету», «Химиялық зертхананың технологиясы», «Баспаға шығару технологиясы», «Бетонмен жұмыс жасау технологиясы бойынша қатысып, еліміздің намысын қорғайды.
