Жыл сайын «Биыл Оскарды кім алады?» деп күтетін әлемдік кино жүлде жаңашылдық үстінде. Тарихы 1929 жылдан басталатын Оскар сыйлығының әр кездегі өзгерістері әртүрлі. 1961 жылға дейін 12 аталым алынып тасталып ескіргендердің тізіміне ілінді, ал жаңадан енгізілген аталым 80-ші жылдарға тиесілі. Енді, міне, келер жылы Оскар табысталатын жаңа аталым пайда болмақ. 

Ия, араға отыз жеті жыл салып Оскардың 24 аталымы тағы біреуімен толықпақ. Осы уақытқа дейін киноакадемия кино көрерменнің көзайымына айналған «Звездные войны», «Стражи галактики» сияқты блокбастерлерді елемей, жүлде алушылардың жанына жақындатпай жүр еді. Енді келер жылдан бастап атышулы блокбастерлер «Ең танымал үздік фильм» бойынша Оскар алады.

Сондай-ақ, тағы бір жаңалық. Әдетте, Оскар жүлдесін бүкіл әлем төрт сағаттап тамашалайтын. Ұзаққа созылған марапаттау рәсімі соңғы жылдары экран алдындағы көрерменді жалықтырып жіберді. Себебі өзгеріс жоқ – қызыл кілем, әдемі киінген жұлдыздар, Оскар алады, сөз сөйлейді... Көрермен «тікелей эфирді көрмей-ақ та, Оскар кімге бұйырғанын кейін білермін» дейді де, теледидарды не смартфонын сөндіріп жүре береді. Осылайша көпшілік жаңашылдықты көргісі келетіндерін жеткізгендей болды. Оскарды марапаттау сәтінің тікелей көрсетілімінің рейтингісі төмендеді. Енді, міне, биыл, киноакадемия жаңа аталымның қосылғанын жариялады және Оскардың өзге «қызықсыз» аталымдары тікелей эфирден алынып тасталатыны мәлім болды. Бұның бәрі, біріншіден, бұрынғы рейтингті қайтару үшін, марапаттау рәсімінің уақытын қысқарту үшін жасалып отыр және көрерменнің де көңілінен шығады деген үмітте.

2019 жылғы Оскар сыйлығы 24 ақпанға жоспарланған.

Материалды дайындаған Мақпал Аманбай.

Мәліметтер мен фото шетелдік ақпарат көздерінен алынды.