Қадірменді оқырман, естеріңізде болса qazir «Қайырлы іс» айдарында «ДОС-ART» мәдени-сауық клубының үйлестірушісі, көркемдік жетекшісі және вокал бойынша педагогы Әділбекова Жанармен болған сұхбатты назарларыңызға ұсынған болатын. Бүгін бөлісетін тағы да жағымды жаңалығымыз бар. Жерлестеріміз Испанияның Ллорет де Мар қаласынан қанжығаларына бас жүлде байлап қайтты.
Фестиваль-байқаудың ұйымдастырушылары ұлттар мәдениетін жаңғыртуды, сақтауды және дамытуды көздеді. Испанияның, Қазақстанның, Литваның және өзге де Еуропа елдерінің шығармашылық ұжымдары мен жеке орындаушылары елдерінің абыройын асқақтатуға барынша тырысып, бақ сынасты, баптарын байқатты. Біздің отандастарымыздың да байқауға бабы келісіпті. Темірбаев Азамат пен Әділбекова Жанар Ллорет де Мар қаласындағы испаниялық мемлекеттік театр шаңырағында Коста Брава қаласының мэриясы мен мәдениет басқармасының ұйымдастыруымен өткен Халықаралық «TALENT INTERNATIONAL» байқауына қатысып, бақтарын сынап қайтты. Бар еңбек зая кеткен жоқ: жеке орындау бойынша А.Темірбаев ІІ санатты лауреат, Ж.Әділбекова І санатты лауреат атанды. Ал қосыла шырқаған әндері байқаудың Бас жүлдесін бұйыртты.
«Бізді зал алдына шыға келгенімізді ерекше жылылықпен қарсы алды. Бұл біздің бірнеше тілде ән шырқап, тыңдаушылардың құлағынан кіріп, бойларын алатындай әбден дайындалып барғанымыздан болар. Мысалы, «Вокал.Дуэт» аталымы бойынша алғашқы әнді италиянша шырқап, артынан ағылшын тілінде айттық. Ал жеке орындау үшін ана тіліміздегі шығарманы таңдадық, төл тілімізде шырқаған әнді жиылғандар жете түсіне қоймаса да қошеметтерін аямады», - деді, Астанаға аман – есен жеткен Азамат пен Жанар.
Азамат сүйікті әншілерінің бірі, шығармашылығын әлем танитын Батырхан Шүкеновтың репертуарынан «Қайран көңіл-ай» әнін таңдапты, ал Жанар - «Ізін көрем» әнін айтып шықты. Жанардың македонша шырқаған «Сrno i belo» әнін де қазылар мен көрермендер бір мінсіз деп таныпты.
Аталған байқауға Елордамыздан аттанған Азамат пен Жанар "Дегдар" қорына алғыстарын жеткізгілері келеді, Халықаралық фестиваль-байқауына қатысуларына жасаған мүмкіндік пен жасаған жәрдемі үшін ризашылықтарын жеткізуде.
«Дегдар» гуманитарлық қорының мәдени-ағарту қызметінің шығармашыл тұлғаларға қашан да тіреу болуға дайын екендігі көңіл қуантады.
Qazir үшін көңіл қуантатын жаңалықты жеткізген : Жәннат Манасбайқызы
