Желтоқсан айында «Астана Опера» Камералық залында елорда тұрғындары мен қонақтарына мерекелік концерт бағдарламалары, ересектер мен балаларға арналған жарқын қойылымдар, отандық және шетелдік композиторлардың туындылары ұсынылмақ, - деп хабарлайды Qazir.kz театрдың баспасөз қызметіне сілтеме жасап.
1 желтоқсан, Тұңғыш Президент күні, сағат 15.00-де «Елі сүйген, елін сүйген Елбасы!» мерекелік концертінде Қазақстан халықтарының әндері, классик композиторлардың туындылары мен Елбасының сүйікті әндері шырқалады.
11 желтоқсан сағат 19.00-де ұлы неміс классигі Людвиг ван Бетховеннің 250 жылдығына арналған музыкалық кеш «FORTE-TRIO шақырады» топтамасының концерттер сериясын жалғастырады.
15 желтоқсан сағат 12.00-де қазақстандық сазгер Тілеуғазы Бейсембектің «Самұрық келген таң» музыкалық ертегісі сахналанады. Жас көрермендерге сиқырлы Самұрық құсын іздеп, жолға шыққан Айдар мен Айжанның бастан кешкен оқиғалары баяндалады. Ертегінің ержүрек кейіпкерлері мен олардың адал достарын ғажайып «Мәңгілік елі» күтеді.
16 желтоқсан күні сағат 17.00-де Қазақстанның Тәуелсіздік күніне арналған «Елім менің аңсаған...» мерекелік концерті өтеді. Жастар жылының соңында «Астана Опера» Камералық залының сахнасына жақында ғана көрнекті байқаулардың лауреаты атанып, халықаралық шығармашылық жобаларға жетістікпен қатысқан жас музыканттар шықпақ.
21 желтоқсан сағат 17.00-де Жастар жылы аясында тыңдарман қауым назарына жас дарындарды қолдау мен дамытуға бағытталған «Скрипкадан төгілген махаббат әуендері» концерті ұсынылмақ. «Жастар – ел тірегі» топтамасында өз шығармашылығымен ел мәдениетін шетелде танытып жүрген көрнекті қазақстандық музыканттар өнер көрсетуде. 24 желтоқсан сағат 19.00-де «PICCOLO» камералық театры жобасы аясында Джоаккино Россинидің «Жібек саты» бір бөлімді фарс-операсы ұсынылады.
25 желтоқсан сағат 19.00-де «Астана Опера» Мәрмәр залында рождестволық концерт өтеді, театрдың солистері, хоры мен симфониялық оркестрі Г.Ф.Гендельдің әйгілі «Мессия» ораториясын орындайды. Рождестволық керемет туынды алғаш рет театрдың кіші Мәрмәр залында шырқалады.
Фото: театрдың баспасөз қызметінен.
