Еліміздің ежелгі тарихынан хабардар болғыңыз келсе, киелі жерлер тізіміне енген 100 жалпыұлттық қасиетті нысандардың қай өңірлерде орналасқандығы жайлы мәліметтер қызықтырса әр дүйсенбі сайын өздеріңізге арналған «Көне дүние күмбірі» айдарын оқи отырыңыз.
Яссы қалашығының іргесі (Түркістан, Күлтөбе) – V-VІ ғасырларда қаланған, Қазақстанның көне қалаларының бірі. Түркістанның ежелгі аты – Яссы. Қалашық Оңтүстік-Қазақстан облысындағы қазіргі Түркістан қаласының аумағында орналасқан. Археологтар ертедегі Яссының орны қазіргі Күлтөбеге сәйкес келетінін дәлелдеп отыр.
Күлтөбе – елiмiздегi көне қалалардың бiрi. Түркістан қаласының бертінгі ортағасырлық тарихының соңғы кезеңінде, бәлкім, XiX ғасырда Күлтөбе қыраты, бүкіл Оңтүстік рабат сияқты, бекініс қабырғаларымен қоршалғандықтан, Күлтөбе ортағасырлық Түркістанның әскери құрылыс жүйесіне жатады.Түркiстан қаласындағы Қожа Ахмет Ясауи кесенесiнен 350 метр қашықтықта орналасқан. Түркістан тарихы тап осы жерден басталады. Есім ханнан бастау алып, XІV-ХViiІ ғасырлардаҚазақ хандығының астанасы болған. Археологтар Түркістан қаласының тарихы тереңде жатқанын дәлелдеп отыр. Қаланың іргетасы біздің заманымыздың 1-мыңжылдықтың бас кезінде қаланған. Яғни, біздің заманымыздан бұрынғы 1-мыңжылдықтан Түркістан қаласы төңірегінде Қазақстанның басқа да өңіріндегідей Андронов мәдениетін жасаушылар тұрған. Түркістан қаласының айналасындағы аймақта тас дәуірі ескерткіштері – Шоқтас, Қошқорған бұл өңірде әуелгі адам кем дегенде 550 мың жыл бұрын мекен еткенін көрсетеді.
Түркiстан қалашығы сол уақыттарда iрi сауда жолдарының бiрi болған. Сондықтан қиындықтан тез жол тауып, қайта даму жолына түсе бастайды.Орта ғасырларда қала дамып келе жатқан сауда жолында ыңғайлы орналасқандықтан, қарқынды гүлдену кезеңін өткереді. ХІІ ғасырда мұнда ақын, дегдар ойшыл, сопылық ілімнің ірі өкілі Қожа Ахмет Ясауи өмір сүріп, осы жерде дүниеден өтеді. 1396-1398 жылдары әмір Темірдің бұйрығымен Қожа Ахмет Ясауидің ескірген кесенесінің орнына жаңа көрнекті мемориалды кешен тұрғызыла бастайды. XVI-XVIII ғасырларда бұл нысаналы қала Қазақ хандығының астанасына айналады. Ол сауда жолдары қиылысында орналасқандықтан, ұзақ уақыт бойы өңірдің саяси және мәдени орталығы саналды. Әрі қаланың сыртында және ішінде орналасқан көптеген көрнекті діни ғибадатханалардың арқасында ортаазиялық мұсылмандар үшін қасиетті қала – кіші Мекке атағына ие болды.
Бұл жерге алғаш рет 1972 жылы археологиялық қазба жұмыстары жүргiзiлдi. Күлтөбеден 7-8 ғасырларда пайдаланылған Отырар зергерлерiнiң теңгелерi мен қыш ыдыстары табылып, сол жәдiгерлер туралы ғана ақпарат берiлдi. Белгiленген аймақтар алты метрге дейiн қазылып, одан сайын тереңдей түстi. 23 қыш ыдыстың сынығы табылды. Бiрақ олар толық зерттелген жоқ. Археологтардың болжауынша, бұл ыдыстар 4-5 ғасырларда кеңiнен қолданылған. Қазбаның ортасынан үлкен шар тәрiздi мекенжай табылған. Тарихшылар 14-ғасырда Күлтөбедегi бекiнiс қиратылып жойылғанын, оның бүкiл аумағы зиратқа айналғанын айтады. Бүгінде қаланың тарихи орталығының аумағы 88,7 га құрайды. Археологиялық зерттеулердің нәтижесінде кесене ғимаратына солтүстік шығыстан жалғасқан және қамал қабырғаларымен шектелген қалашықтың бөлігі оның орталығы – қамалы болғаны анықталды.
«Ислам дінінің рухани қазығы болған Әзірет Сұлтан мазарының айналасы қалың қорымға айналған. Қазақтан шыққан атақты батыр, билер, хандар мен сұлтандар ұрпақтарына өзін Әзірет Сұлтанға жерлеуді аманат еткен», – деп жазады тарихшы ғалым, профессор Мақсат Алпысбес.
Түркістанда ұлттық пантеон қалыптасуының маңызы өте зор, бір тудың астындағы біртұтас елдің мұрат-мүддесіне қызмет етері айдан анық. Түркiстан қаласы бүгiнде бүкiл түркi әлемiнiң мәдени астанасына айналған. Рухани ордаға келгендер ең алдымен мұндағы Қожа Ахмет Ясауи кесенесiне зиярат етедi. Олар мәңгі тыныстап жатқан Есiм, Абылай секiлдi хандар мен би-сұлтандардың рухына тағзым етеді. 2017 жылғы Түркістан қаласы «Түркі әлемінің мәдени астанасы» болып жарияланcа, 2018 жылы Түркістан облысының орталығы болды.
«Қазақстанның жалпыұлттық 100 қасиетті нысандары» кітабынан.
Фото: ашық ақпарат көзінен