«Шаһарларға саяхат» айдарында жер асты байлығы мол, көмір өндірісі дамыған,экономикасы мен мәдениеті жағынан да елімізге танымал өнеркәсіпті облыстың орталығы- Қарағанды жайлы деректермен таныстырамыз.
1. Қала жайлы деректер.Өндірісі дамыған облыстың әкімшілік-орталығы саналатын қала, Петропавл-Шу темір жол бойындағы ірі темір жол стансасы, әуе, автомобиль қатынасының торабы болып табылады. Оның іргетасы Қарағанды көмір алабының орталығындағы шахтерлер кенттерінің негізінде қаланған. Тұрғындары санының тез өсуіне байланысты 1934 жылы қалаға, 1936 жылы облыс орталығына айналды.
2. Шаһар тарихынан бір үзік сыр.Қарағандының 170 жылдық тарихы бар. Қараған көп өсетіндіктен қала «Қарағанды» деп аталған. Бұл жерден 1833 жылы Байжанов Аппақ тас көмір тапқан. Өтепов деген бай Қарағанды өңірін Н. Ушаковқа 250 сомға сатқан. Орыс кен кәсіпкерлері Ушаков пен Рязанов 1856 жылдан бастап Қарағандыдан көмір өндіре бастайды. Өндірілген көмір Спасск мыс қорыту зауытына тасылып тұрған.
3. Қарағанды еліміздегі экономикасы дамыған өнеркәсіпті-индустриалды қала. Қаланың негізгі кәсіпорындары: «Қарағанды-Жарық» ЖШС, «Қарағанды Маргарин зауыты» АҚ, «Эфес Қарағанды Сыра қайнату зауыты» АҚ ЖК, «Қарағанды конфеті» АҚ, Қарағанды металлоконструкция заводы «Имсталькон» АҚ филиалы, «Қарағанды Жылу» ЖШС. Өндірілетін өнімнің негізгі түрлері: электр энергиясы; жылу энергиясы; маргарин өнімі; сыра; конфеттер.Өнеркәсібінің басты саласы – тас көмір өндіру. Олармен «Қарағандыкөмір», «Көмір-Инвест», «Трансэнерго» ЖШС-терінің ірі кәсіпорындары шұғылданады.
4. Қарағанды ғылым, білім, мәдениет орталығы. Мұнда Қазақстан Республикасы Ғылым Академиясының Орталық Қазақстан бөлімшесі, 19 ғылыми-зерттеу және жобалау институттары орналасқан. Қарағанда мемлекеттік университеті, техникалық университет, медицина академиясы, ішкі істер Министрлігінің заң институты және әр саладан мамандар даярлайтын мемлекеттік емес 10 жоғары оқу орны жұмыс істейді. 10 кәсіптік-техникалық мектеп, 7 колледж, 80 мектеп, 39 мектепке дейінгі балалар мекемесі, 40 аурухана, 84 амбулатория мен емхана, 24 кітапхана, 3 мұражай, 6 мәдениет үйі мен клубтар, 2 драма театры, музыкалық комедия театры, филармония, цирк, спорт кешені, стадион, екі үлкен саябақ бар.
5. Қаладағы мәдени орындар. Өнерді құрметтейтін қауым әрқашан «Шалқыма» концерт залына барады, онда классикалық музыка концерттерімен композиторлар, дирижерлар және музыканттар өнер көрсетеді. Сондай-ақ қала тұрғындары мен қонақтары С.Сейфуллин атындағы қазақ драма театрына, К.Станиславский атындағы драма театрына, Академиялық музыкалық комедия театрына және өзінің қорында 134-810 экспонаттары бар Қарағанды облыстық тарихи өлкетану мұражайына, Экологиялық мәдениетті дамыту мен сақтауға мамандандырылған Қарағанды экологиялық мұражайына бара алады.
6. Ескерткіштер –елдік пен ерліктің белгісі. Қала аумағында 50-дей тарихи және мәдени ескерткіштер бар.Жезқазған бағытынан келе жатқан күре жол бойында тума дарын иесі, Қасым Аманжоловқа орнатылған ескерткіш тұрса, қала әкімдігінің жанында Бұқар жырау бабамыздың ескерткіші қойылған. «Шалқыма» концерт залы жанында Абай ескерткіші, облыс әкімдігінің қарсысында Қаздауысты Қазыбек бидің мүсіні асқақтап тұр. Қарағандыға келген жан алдымен академик Қаныш Сәтбаевтың ескерткішіне көз салады. Көмірді алғаш тапқан Аппақ Байжановқа арналған ескерткіш 1999 жылдың тамыз айында облыстық тарихи-өлкетану мұражайының жанындағы алаңда ашылса,академик Е.А. Бөкетов ескерткіші 2006 жылы академик Е.А. Бөкетов атындағы Қарағанды мемлекеттік университетінің бас ғимаратының кіре берісінде орнатылған.
7. Қаланың бүгінгі тынысы. Қала аумағы 543,3 шаршы километрге тең. Қала халқының саны 2016 жылғы 1 қаңтардағы есеп бойынша 497 824 адам делінсе,бүгінде 500 мыңдай деп те айтылып жүр. Қарағандыға бара қалсаңыз алдымен шаһар тарихынан сыр шертетін облыстық тарихи-өлкетану мұражайына бағыт түзеңіз. Қарағандының өткені мен бүгіні жайлы мәліметтерді содан таба аласыз.
Қарағанды жайлы мәліметтерді ашық ақпарат көздерінен жинақтаған: Раушан Бекмырзақызы.
Иллюстративное фото: ticketon.kz